Kvinpetalo proponas staĝojn de diversaj niveloj, i.a. por pretigi al la ekzamenoj de FEI.
Majo 11a-16a
Harmonia ĝardenumado por postaj promenoj
En niaj evoluintaj landoj, ni kondutas kvazaŭ ni posedus kvar Terojn je nia dispono. La ideo ke la naturo kontraŭas la homaron - ĝian kulturon esence - ne estas universala, ĝi eĉ estas sufiĉe freŝdata okcidenta elpensaĵo.
Por ke niaj gefiloj kaj genepoj havu la eblecon pluvivi en loĝebla Tero, nepre ni ŝanĝu nian sintenon rilate al la aliaj vivantaĵoj. Ŝanĝi nian gluteman civilizacion aspektas eble kiel grandega utopia defio (!), sed komenci en niaj ĉirkaŭaĵoj eblas ofte per simplaj rimedoj. « Nur la unua paŝo kostas » diras la proverbo.
Inter niaj domoj kuŝas ĝardeno kiun oni planas aranĝi por favori la biodiversecon. Kvinpetalo membriĝis al la asocio LPO por protekti kaj gastigi la birdojn. Ofte pro indiferenteco aŭ nekono ni seniĝas je la plezuro kontakti la aliajn vivantaĵojn. Admiri, kontempli, observi estas la unuaj paŝoj al respekto kaj pli bona kono.
En tiu staĝo ni lernos kiel riĉigi la diversecon en nia ĝardeno : ne tro draste falĉi nian razenon por akcepti sovaĝajn florojn kaj inviti papiliojn, nutri la grundon per kompoŝto, elekti la specojn de arbedoj kaj arboj plej konvenaj por loĝi kaj nutri la sovaĝajn bestetojn, instali lignan nestujon por la birdoj… Vi pensos kaj agos. Pensu preni konsekvencajn vestaĵojn.
Ĉar niaj someroj pli kaj pli varmas, nepre ni proponu specialan lokon por ke la bestoj, kiuj soifas kaj bezonas bani sin, trovu akvon je sia dispono. Oportune ni havas amason da disponeblaj ŝtonoj por konstrui belan basenon por niaj flugantaj kaj naĝantaj fratetoj ! Ĝis baldaŭ...
Bernard Lagrange
Junio 15a
Ĝeneralaj asembleoj
Ordinara ĝenerala asembleo de SYM
Eksterordinara asembleo por modifo de la statuto
Junio 16a-20a
Promenado tra naturo kaj Vikipedio
Ĉiutage, matene aŭ posttagmeze laŭ la vetero, ni vizitos naturan medion - arbaron, herbejon, vojrandon, lag- aŭ riverbordon... kaj malkovros ĉefe plantojn, eble fungojn. Kaj interne de Kvinpetalo, ni determinos, iom studos pri botaniko kaj riĉigos Vikipedion per informoj ligitaj al la renkontitaj estuloj.
Ja unuavide ambicia programo, sed ne timu : ĝi estas alirebla por ĉiuj, kaj la celo pliampleksigi Vikipedion ege gravas por la disvolvo de nia esperanta komunumo.
Ne forgesu vian komputilon, promenŝuojn, eventuale determinlibrojn (eĉ bazajn) kaj lupeon.
Tiu staĝo taŭgas ankaŭ por prepariĝi al la faka branĉo "Sciencoj kaj Tekniko" de la Atesto pri Kapableco de FEI.
Alain Favre
Aŭgusto 25a-29a
Staĝo pri astronomio
Ĉirkaŭ Astronomio, mi klopodos samtempe helpi vin malkovri la bazan vorttrezon pri Astronomio kaj klarigi la diversajn astrajn movojn kaj priskribojn. Kaj kompreneble, se la vetero mildas, uzi observilojn por spekti la ĉielan volton : stelojn, konstelaciojn, planedojn, ktp.
Apud la faka aspekto, ni povos babili pri ligo inter Astronomio kaj ĉiutaga vivo. Neatendite, ni konstatos ke la plej modernaj kosmaj teorioj estas ligitaj al niaj kulturaj kutimoj. Do glitado al filozofiaj aspektoj. Kaj kompreneble ĉiuj aliaj astronomiaj temoj kiuj kreskos pro kaj dum nia kunveno.
Patrick Lagrange
Estas planataj ankaŭ diversaj staĝoj... Ili estos anoncataj tuj, kiam la datoj estos deciditaj.
La gvidantoj de tiuj staĝoj ĝenerale estas altnivelaj fakuloj agnoskataj en siaj fakoj ekster nia esperanto-mondeto. Bonvenon al Kvinpetalo !
N.B. La datoj de la staĝoj indikas la unuan kaj la lastan tagojn. Oni prefere alvenu la antaŭan tagon. (Notu, ke vespermanĝoj kutime okazas je la 19-a kaj duono)
Fine de staĝo preparanta ekzamenon, plejofte eblas trapasi ĝin. Plej malfrua kandidatiĝo : du semajnojn antaŭ la staĝo.
